وزیراعظم عمران خان کراچی پہنچ گئے

Share this story

ویب ڈیسک – وزیراعظم عمران خان کراچی کے دورے پر پہنچ گئے وہ سندھ کے گورنر عمران اسماعیل ، وزیراعلیٰ مراد علی شاہ، صوبائی اسمبلی کے ارکان اور تاجر سے ملاقات کریں گے۔ اطلاعات ونشریات کے وزیر شبلی فراز اور رکن قومی اسمبلی عامر محمود کیانی وزیراعظم کے ہمراہ ہیں۔

کراچی میں موجودہ صورتحال پربریفنگ بھی وزیراعظم کی مصروفیات کاحصہ ہے۔ وزیراعظم صحافیوں کو بریفنگ کے دوران کراچی کو بہتر بنانے کے منصوبے کے تحت اہم اعلانات کریں گے۔

کراچی کیلئے ٹرانسفارمیشن پلان کا اعلان کیا جائے گا جس میں شہر کے نالوں کی صفائی، نکاسی آب اور کچرا ٹھکانے لگانے کے منصوبے بھی شامل ہیں۔ صاف پانی اور ٹرانسپورٹ کیلئے بھی وفاق فنڈز دے گا۔

وزیراعظم کی گورنر اور وزیراعلیٰ سندھ سے ملاقات بھی شیڈول ہے۔ وزیر اعلی سندھ آج دوپہر گورنر ہاؤس میں وزیراعظم عمران خان سے ملاقات کریں گے۔

ہم نیوز کے مطابق وزیراعظم کے دورہ کراچی میں وفاقی وزرا، این ڈی ایم اے کے حکام اور پاکستان تحریک انصاف کے رہنما بھی ہمراہ ہیں۔

ذرائع کے مطابق وزیراعظم سے اراکین اسمبلی، اتحادی جماعتوں کے رہنما اور ممتاز تاجر و کاروباری شخصیات کی بھی ملاقات ہو گی اور  این ڈی ایم اے کے حکام وزیراعظم کو شہر کی صورتحال پر بریفنگ بھی دیں گے۔

ہم نیوز کو ذرائع نے بتایا ہے کہ وزیراعظم اپنے دورہ کراچی میں کراچی کے ساتھ پورے صوبہ سندھ کے لیے بڑے پیکج کا اعلان کریں گے۔ ذرائع کا دعویٰ ہے کہ وزیراعظم کی جانب سے اعلان کردہ پیکج اربوں روپے مالیت کا ہوگا۔ عمران خان کی جانب سے کراچی کی بحالی کے لیے شارٹ ٹرم ،مڈ ٹرم اور لانگ ٹرم پیکجوں کا اعلان متوقع ہے۔

وزیراعظم جن پیکجوں کا اعلان کریں گے ان میں شہر کی صفائی، نالوں کی صفائی اور نکاسی آب کے منصوبے، صاف پانی کی فراہمی اور کچرا ٹھکانے لگانے کے منصوبے بھی شامل ہیں۔

حالات کا جائزہ لینے کے لیے خود کراچی جاؤں گا، وزیراعظم

ذرائع کے مطابق وزیراعظم عمران خان کی جانب سے دورہ کراچی میں ٹرانسپورٹ کے نظام سمیت دیگر ترقیاتی منصوبوں کے لیے بھی وفاقی حکومت کی جانب سے فنڈز کی فراہمی کا اعلان متوقع ہے۔

ہم نیوز کے مطابق وزیراعظم عمران خان کی جانب سے جن منصوبوں کے اعلانات کیے جائیں گے ان میں متاثرہ کاروباری طبقات بھی مستفید ہوں گے۔

ہم نیوز کے مطابق وزیراعظم عمران خان گورنر ہاؤس سندھ میں پریس کانفرنس سے بھی خطاب کریں گے۔

کراچی میں ہونے والی شدید بارشوں کے بعد وزیراعظم عمران خان نے اعلان کیا تھا کہ وہ از خود کراچی کا دورہ کریں گے تاکہ صورتحال کا جائزہ لے سکیں۔

پاک فوج کے سربراہ جنرل قمر جاوید باجوہ شہر قائد میں ہونے والی بارش کی تباہ کاریوں کا جائزہ لینے کے لیے کراچی کا دو روزہ دورہ کرچکے ہیں۔ پاک فوج کے سربراہ نے اس سے قبل پاک فوج کو ریلیف آپریشن بھی شروع کرنے کی ہدایت کی تھی۔

شہر قائد کا گزشتہ دنوں قومی اسمبلی میں قائد حزب اختلاف میاں شہباز شریف نے بھی دورہ کیا جس میں انہوں نے  وزیراعظم عمران خان کی حکومت کو کڑی نکتہ چینی کا نشانہ بنایا۔

Share this story

Leave a Reply