پی آئی اے کو پہلی بار امریکہ تک براہ راست پروازیں چلانے کی اجازت

Share this story

پی آئی اے کو تاریخ میں پہلی مرتبہ پاکستان سے امریکہ تک براہ راست پروازیں چلانے کی اجازت دی گئی ہے جس کے تحت آنے والے کچھ دنوں میں پی آئی اے کی 12 فلائٹس براہ راست امریکی ریاست نیویارک جائیں گی۔

ان پروازوں کے ذریعے امریکہ میں پھنسے پاکستانیوں اور وہاں وفات پا جانے والے افراد کی متیوں کو واپس لایا جائے گا۔

گزشتہ ہفتے پاکستان نے کورونا وائرس کی وبا کے باعث وہاں پھنسے پاکستانیوں کو واپس لانے کے لیے امریکہ سے پی آئی اے کی خصوصی پروازیں چلانے کی اجازت مانگی تھی۔

پی آئی اے کے چیف ایگزیکٹو افسر ایئر مارشل ارشد ملک نے اس بارے میں اسلام آباد میں امریکی سفارتخانے کو خط بھی لکھا تھا۔

واضح رہے کہ اس سے قبل پی آئی اے کا امریکہ آپریشن یورپ یا برطانیہ کے ائیرپورٹس سے سیکورٹی کلئیر ہو کر جایا کرتا تھا۔

یہ پروازیں برطانیہ کے شہر لندن اور مانچسٹر، فرانس کے شہر پیرس، آئرلینڈ کے شہر شینن اور سپین کے شہر بارسلونا کے راستے امریکہ پہنچا کرتی تھیں۔

ترجمان پی آئی اے کے مطابق امریکہ تک براہ راست پروازوں کی اجازت ملک کی سکیورٹی صورتحال میں بہتری، حکومتی پالیسی اور پی آئی اے کے سکیورٹی سے متعلق اقدامات کی عکاس ہے۔ انھوں نے کہا کہ پی آئی اے امریکہ کی ریلیف پروازیں چلائے گا جہاں ہزاروں پاکستانی پی آئی اے کے منتظر ہیں اور پی آئی اے ان میتوں کو بھی بغیر کسی معاوضے واپس لے کر آئے گی جو دیار غیر میں چل بسے ہیں۔

سی ای او پی آئی اے ائیر مارشل ارشد ملک نے کہا کہ آخری پاکستانی کے وطن واپسی تک پی آئی اے کا یہ آپریشن جاری رہے گا۔

Source BBC Urdu

Share this story

Leave a Reply