وزیر اعظم عمران خان کی چینی صدر کو دورہ پاکستان کی دعوت

Share this story

اسلام آباد: وزیر اعظم عمران خان اور چینی صدر شی جن پنگ کے درمیان فون پر رابطہ ہوا، وزیر اعظم عمران خان نے چینی صدر کو جلد دورہ پاکستان کی دعوت دی۔

تفصیلات کے مطابق وزیر اعظم عمران خان اور چینی صدر شی جن پنگ کے درمیان فون پر رابطہ ہوا، دونوں رہنماؤں میں خطے کی صورتحال اور علاقائی امور پر تبادلہ خیال ہوا۔

وزیر اعظم عمران خان نے چینی صدر کو کمیونسٹ پارٹی کی صد سالہ تقریبات پر مبارکباد دی، انہوں نے غربت کے خاتمے کے لیے چین کی شاندار کارکردگی کو بھی سراہا۔

دونوں رہنماؤں نے سفارتی تعلقات کے 70 سال پورے ہونے پر ایک دوسرے کو مبارکباد دی، گفتگو میں دو طرفہ اسٹریٹجک تعاون پر مبنی شراکت داری کے تمام پہلوؤں کا جائزہ لیا گیا۔

دونوں رہنماؤں نے باہمی اقتصادی اور تجارتی تعلقات مزید مضبوط بنانے پر بھی اتفاق کیا جبکہ سی پیک منصوبوں کی بر وقت تکمیل سے متعلق بھی خصوصی بات چیت ہوئی۔

وزیر اعظم عمران خان نے سی پیک کے اقتصادی زون میں چینی سرمایہ کاری کا خیر مقدم کرتے ہوئے کہا کہ ایم ایل ون ریلوے منصوبے پر کام کا جلد آغاز علاقائی ترقی کا باعث بنے گا۔

وزیر اعظم نے موسمیاتی تبدیلیوں سے نمٹنے کے لیے چینی اقدامات کو بھی سراہا۔ دونوں رہنماؤں میں مختلف شعبوں میں پاک چین تعاون مضبوط بنانے پر اتفاق ہوا۔

گفتگو میں دونوں رہنماؤں کی افغانستان کی تازہ صورتحال پر بھی بات چیت ہوئی، وزیر اعظم عمران خان کا کہنا تھا کہ افغان عوام کو معاشی مسائل سے نکالنے کے لیے دنیا کردار ادا کرے۔ افغانستان کو انسانی بحران سے بچانے کے لیے مدد کرنی ہوگی۔

وزیر اعظم عمران خان نے چینی صدر کو جلد دورہ پاکستان کی دعوت بھی دی۔

Share this story